БАТЫС ҚАЗАҚСТАН ОБЛЫСЫНДА МҮЙІЗДІ ІРІ ҚАРА ЛЕЙКОЗЫНЫҢ ЭПИЗООТОЛОГИЯСЫ

Abstract

Мақалада Батыс Қазақстан облысында ірі қара малдарының лейкозға шалдығуы мен оның эпизоотиялық жағдайы қарастырылған. Бұл аурудың аймақта таралуы мен ықтимал себептері зерттеліп, лейкоздың жануарлар денсаулығына әсері, сондай-ақ оның табиғи факторлармен байланысы талданған. Зерттеу барысында лейкоздың диагностикалық әдістері мен клиникалық көріністері кеңінен қарастырылып, ИДР және гематологиялық зерттеулер арқылы нақты нәтижелер алынған. Лейкоздың таралуына әсер ететін экологиялық, биологиялық факторлар мен ветеринариялық шаралардың тиімділігі бағаланған. Аймақтағы лейкозбен күресуге бағытталған профилактикалық шаралар ұсынылып, олардың тиімділігі сарапталған. Мақалада осы мәселелерді шешу үшін нақты қадамдар ұсынылып, сауықтыру шараларының сирек жүргізілетіндігі және олардың эпизоотиялық көрініске әсері қарастырылған. Қорытындылай келе, лейкозға серологиялық зерттеулер Батыс Қазақстан облысының ветеринариялық зертханаларында үнемі жүргізіліп жатқанымен, сауықтыру және алдын алу шараларының жеткіліксіздігі мен олардың әсерінің төмендігі байқалады. Аймақтағы мал шаруашылығында аурудың алдын алу мақсатында профилактикалық шараларды күшейту қажет. Мүйізді ірі қара лейкозы тек экономикалық шығынға ұшыратып қоймай, малдың өнімділігін төмендетіп, ерте жарамсыздыққа шығару мен лажсыз сойылған малдың ұшасын жою қажеттілігін туындатады. Қазіргі уақытта лейкоз мәселесі басты орынға қойылып отыр, себебі ең алдымен жоғары өнім беретін сиырлар зақымдалады, бұл әсіресе нарықтық жағдайда айтарлықтай зиян келтіреді. Лейкозбен күрес шараларының басты буыны – оның ерте диагнозын қою болып табылады.